Habari njema wateja wa benki ya FBME

14May 2019
Na Mwandishi Wetu
DODOMA
Nipashe
Habari njema wateja wa benki ya FBME

SERIKALI inafanya mazungumzo na Serikali ya Cyprus ili kutatua changamoto za malipo kwa wateja walioweka amana zao katika Benki ya FBME ambayo ilifutiwa leseni ya kufanya shughuli za kibenki hapa nchini na Benki Kuu ya Tanzania (BoT).

Naibu Waziri wa Fedha na Mipango, Dk. Ashatu Kijaji

Hayo yalisemwa bungeni jana jijini Dodoma na Naibu Waziri wa Fedha na Mipango, Dk. Ashatu Kijaji, alipokuwa akijibu swali la msingi la Mbunge wa Viti Maalum, Asha Abdullah Juma, aliyeuliza kuhusu hatua zilizochukuliwa na serikali kuwasaidia wananchi walioweka amana zao katika Benki ya FBME.

Dk. Kijaji alisema kuwa kazi ya kukusanya mali na fedha zilizokuwa za Benki ya FBME katika taasisi mbalimbali za fedha hasa zilizopo nje ya nchi, limekumbwa na changamoto za kisheria kati ya Tanzania na Cyprus ambako benki ya FBME ilikuwa ikiendesha sehemu kubwa ya biashara zake hivyo kusababisha ucheleweshaji wa ukusanyaji na ugawaji wa fedha na ufilisi.

"Hakuna tarehe rasmi ya kuanza kulipa fedha kwa sasa kutokana na uwapo wa kesi zinazokwamisha zoezi la ukusanyaji mali na madeni ya Benki ya FBME," alieleza Dk. Kijaji.

Alisema Sheria ya Benki na Taasisi za Fedha ya mwaka 2006 inaeleza kuwa amana au akiba za wateja katika benki au taasisi zina kinga ya bima ya amana ya kiasi kisichozidi Sh. milioni 1.5, na iwapo mteja ana salio la amana la kiasi kisichozidi Sh. 1.5 atapata fidia ya asilimia 100.

Aidha, alisema wateja walio na zaidi ya Sh. milioni 1.5 wanalipwa Sh. milioni 1.5 kama fidia ya bima ya amana na kiasi kinachobakia kinalipwa kwa mujibu wa sheria na taratibu za ufilisi.

Hata hivyo, alisema malipo kwa mujibu wa sheria na taratibu za ufilisi yanategemea makusanyo ya fedha kutoka kwenye mauzo ya mali pamoja na fedha zilizowekwa na benki katika taasisi mbalimbali za fedha za ndani na nje ya nchi.

Habari Kubwa