Hatima ya Lissu kesho

24Feb 2020
Allan lsack
Arusha
Nipashe
Hatima ya Lissu kesho

MAHAKAMA Kuu kesho itaanza kusikiliza maombi ya aliyekuwa Mbunge wa Singida Mashariki, Tundu Lissu, kumruhusu kwenda Mahakama ya Rufani kupinga uamuzi wa Spika wa Bunge, Jobu Ndugai, kumvua nafasi ya ubunge wa jimbo hilo.

Juni 20, mwaka jana, Spika alitangaza kumvua Lissu ubunge kwa madai ya kutotimiza masharti ya kuendelea kuwa mshiriki katika shughuli za Bunge.

Akizungumza na waandishi wa habari jijini Arusha, Msemaji wa familia ya Lissu, Wakili Alute Mughway, alisema Mahakama Kuu Masjala ya Dar es Saalam, Februari 25, mwaka huu, itasikiliza maombi ya Lissu, endapo atakubaliwa kwenda Mahakama ya Rufani kupinga uamuzi wa kuvuliwa nafasi yake ya ubunge.

Mughway alisema, Lissu alipeleka ombi hilo Septemba mwaka jana dhidi ya Spika Ndugai kumvua nafasi yake ya ubunge na kutangaza Jimbo la Singida Mashariki kuwa wazi.

Septemba 9, 2019, Mahakama Kuu, ilitupilia mbali ombi la Lissu la kupinga kuvuliwa ubunge.

Akitoa uamuzi huo, Jaji Sirilius Matupa, alisema maombi ya Lissu hayatekelezeki kwa sababu mleta maombi alitakiwa kufungua kesi ya kupinga uchaguzi mahakamani, badala yake alipeleka maombi ya kutaka kupinga uamuzi wa Spika.

"Mahakama imepata wakati mgumu sana katika kupitia maombi haya," alisema Jaji Matupa na kuongeza kuwa, kama maombi ya Lissu yakikubaliwa yatasababisha uvunjaji wa Katiba kwa kuwa italazimika kuwa na wabunge wawili kwenye jimbo moja, pia maombi hayo yalichelewa kufikishwa mahakamani.

Msemaji huyo wa familia, Mughway, alisema Lissu, hajaridhishwa na uamuzi wa Mahakama Kuu, hivyo amepeleka maombi mengine kuruhusiwa kwenda Mahakama ya Rufani kutolea uamuzi kama hukumu ya Jaji Matupa ni sahihi kisheria.

Alisema maombi hayo, kwa mara ya kwanza yalitajwa Desemba mwaka 2019, na Februari 25, mwaka huu yatakwenda kusikilizwa.

Akizungumzia Lissu kurejea nchini kutokana na kukamilisha matibabu yake, alisema atarudi baada ya muda kidogo, kwa kuwa anasubiri uchunguzi wa mwisho wa madaktari kuangalia kama matibabu aliyopewa yamekidhi viwango.

Licha ya kuzungumza hayo, alisema Lissu alikuwa na mpango wa kurejea nchini kuendelea na shughuli zake, lakini kinachomkwamisha ni kuhofia ulinzi na usalama wake.

“Mtakumbuka mwaka 2018, kuna mtu aliandika katika mitandao ya kijamii kuwa akirudi safari hii hatutakosea shabaha,” alinukuu Mughway.

“Mimi kwa niaba ya familia nililalamika kwa nini mtu anatishiwa maisha kwamba atauliwa, kosa hili ni la jinai na tulipotoa taarifa kwenye vyombo vya usalama tuliambiwa tuende mahakamani kwa kuwa aliyeandika hivyo, alikuwa anatoa maoni yake kama raia,” alidai.

“Kama mlivyomsikia Lissu kwenye vyombo vya habari amesema hawezi kurudi nchini, hadi hapo atakapohakikishiwa usalama wake na sisi kama familia, ndugu, jamaa na marafiki ndio tulimemwambia asirudi,” alisema.

“Katika mazingira haya hawezi kuja tumemwambia sisi familia hatutaki atuachie watoto na mjane asubiri hadi hapo usalama wake utakapokuwa vizuri,” alisisitiza.

Habari Kubwa