Katibu Mkuu ashtukiza usiku kuangalia kazi ujenzi

15Jan 2019
Na Mwandishi Wetu
Dodoma
Nipashe
Katibu Mkuu ashtukiza usiku kuangalia kazi ujenzi

KATIBU Mkuu Wizara ya Mifugo na Uvuvi anayeshughulikia mifugo, Prof. Elisante Ole Gabriel, amefanya ziara ya kushtukiza usiku saa 5:30 juzi, kujionea maendeleo ya ujenzi wa jengo la wizara katika mji wa serikali jijini Dodoma.

KATIBU Mkuu Wizara ya Mifugo na Uvuvi anayeshughulikia mifugo, Prof. Elisante Ole Gabriel, picha mtandao

Baada ya kufika katika eneo hilo alikuta ujenzi wa jengo unaendelea kama ambavyo mkandarasi SUMA JKT alivyokubaliana na Wizara ya Mifugo na Uvuvi kujenga jengo hilo kwa saa 24 na kuridhishwa na kazi inayoendelea.

“Tunaridhika kwa kweli kama uongozi wa wizara ikiwa ni pamoja na viongozi wetu wa kisiasa, Waziri wa Mifugo na Uvuvi, Luhaga Mpina, ametutaka tusilale tufuatilie kama kazi zinafanyika ndio maana leo hii nimeamua kuja usiku, maana unaweza kuambiwa watu wanafanya kazi usiku na mchana kumbe nikilala na kazi huku zinalala,” alisema Prof. Gabriel.

Aidha, alimtaka mkandarasi SUMA JKT kutobweteka kwa kile alichoelezwa kuwa hadi sasa anafanya kazi nzuri katika ujenzi wa jengo la Wizara ya Mifugo na Uvuvi na kumkumbusha aendelee kufanya kazi kwa kufuata makubaliano yaliyopo katika mkataba waliosaini kwa kujenga jengo hilo kwa ubora na kulikabidhi kwa wakati.

Pia alisema hatua ya Shirika la Ugavi Umeme nchini (Tanesco) kufikisha huduma ya umeme katika eneo hilo, imesaidia kufanya kazi ya ujenzi kuwa na kasi zaidi na kupunguza gharama ya mafuta ya dizeli ambayo yalikuwa yakitumika kwenye jenereta hususan nyakati za usiku kwa ajili ya kuwashia taa na kusukumia mitambo ya ujenzi.

Prof. Gabriel, aliitaja pia Wizara ya Mifugo na Uvuvi kuwa ni moja ya wizara ambayo imechimba kisima chake kwa ajili ya ujenzi.

Kwa mujibu wa mkandarasi SUMA JKT, jengo hilo linatarajiwa kukamilika mwezi Februari mwaka huu na kuanza kutumiwa na baadhi ya watendaji wa juu wa wizara na kujengwa jengo lingine kubwa katika eneo hilo, ambalo litatumiwa na wafanyakazi wote wa wizara waliopo mkoani Dodoma katika mwaka ujao wa fedha wa 2019/2020.

Habari Kubwa