Mtumishi Uhamiaji Shinyanga anusurika kifo nyumba ikiteketea moto

03Oct 2021
Marco Maduhu
Shinyanga
Nipashe Jumapili
Mtumishi Uhamiaji Shinyanga anusurika kifo nyumba ikiteketea moto

FAMILIA ya Mtumishi Idara ya Uhamiaji mkoani Shinyanga, Mwinji Nyombo yenye watu nane, wamenusurika Kifo mara baada ya nyumba ambayo wamepanga katika Mtaa wa Viwanja vya Mwadui Ndembezi kuteketea moto usiku wa kuamkia leo.

Tukio hilo limetokea jana majira ya saa 2 usiku, wakati wanafamilia hao wakiwa wote nyumbani, baadhi wakila chakula sebuleni, wengine wakiwa vyumbani, huku Mtumishi huyo wa Uhamiaji akifanya mazoezi chumbani kwake.

Nyombo akizungumza na Nipashe Digital, alisema wakati akiendelea kufanya mazoezi, gafla akasikia kelele za mdogo wake akisema watoke nje haraka nyumba yao inawaka moto, ndipo wote wakakimbilia nje na kunusurika kifo.

"Moto huu umeanza kuwaka kwenye chumba cha wavulana, na baada ya kutoka nje tukaanza kuomba msaada kwa majirani kuuzima, na jinsi ulivyokuwa kuuzima kwa maji na mchanga usingewezekana, ndipo tukaanza taratibu za kuomba msaada Jeshi la Zimamoto, lakini wamechelewa kufika na nyumba imeteketea yote, ila tuna shukuru wote tupo wazima," alisema Nyombo.

Kwa upande wake Afisa Oparesheni wa Jeshi la Zimamoto na Uokoaji Mkoa wa Shinyanga Inspekta Edward Lukuba, alisema walichelewa kufika eneo la tukio sababu gari lao la kuzimia Moto ni bovu, na wanagari moja tu, ambapo ili bidi waazime kutoka Jeshi la Wananchi Kambi ya Kizumbi, ndipo wakafika na kuuzima moto huo.

 Aidha, alisema chanzo cha Moto huo ni hitilafu ya mfumo wa umeme ndani ya nyumba hiyo, sababu ya waya zake kutokuwa katika mfumo mzuri, na kubainisha kuwa hakuna madhara kwa binadamu zaidi ya mali nyingi kuteketea.

Habari Kubwa