PM aagiza waliowapa mimba wanafunzi wasakwe

26Feb 2019
Na Mwandishi Wetu
Siha
Nipashe
PM aagiza waliowapa mimba wanafunzi wasakwe

WAZIRI Mkuu Kassim Majaliwa, ameagiza viongozi na wazazi wilayani Siha mkoani Kilimanjaro, kuwasaka watu wote waliowapa mimba wanafunzi na kufikishwa kwenye vyombo vya dola.

Alisema katika kipindi cha kuanzia mwezi Januari hadi Desemba, mwaka jana, jumla ya wanafunzi wa kike 57 walikatishwa masomo baada ya kupata mimba na hadi sasa kesi zilizofunguliwa ni sita pekee.

Waziri Mkuu aliyasema hayo juzi alipokuwa akizungumza na wananchi kwenye mkutano wa hadhara uliofanyika katika Uwanja wa Isanja, Sanya Juu, wilayani Siha wakati akihitimisha ziara yake ya kikazi mkoani Kilimanjaro.

“Jambo hili halipendezi, kesi sita tu ndio zimefikishwa mahakamani. Hakikisheni wahusika wote waliowapa mimba wanafunzi wanatafutwa popote walipo, wakamatwe na wachukuliwe hatua kali za kisheria.”

Waziri Mkuu alisema Serikali imeweka sheria kali ya kumlinda mtoto wa kike lengo likiwa ni kumuwezesha amalize masomo yake ili aweze kujikwamua kiuchumi na aondokane na utegemezi na kwamba ni marufuku kuwakatisha masomo.

Alisema watoto wa kike wanatakiwa kuheshimiwa katika jamii na Serikali itatoa adhabu kali ya kifungo cha miaka 30 jela kwa mtu atakayekatisha elimu ya mtoto wa kike iwe kwa kumuoa, kumpa ujauzo na hata akikutwa naye nyumbani kwake au nyumba ya wageni.

“Tukikukuta na binti wa shule katika kona isiyoeleweka tunakukamata na kukuchukulia hatua za kisheria. Ole wenu vijana, mkibainika mmewapa mimba mabinti wanaosoma, adhabu yake ni miaka 30 jela, sasa tafakari kabla ya kutenda.”

Waziri Mkuu alisema kwa wazazi au walezi watakaowaozesha watoto wa kike ambao bado ni wanafunzi na kwa upande wa wazazi watakaomsindikiza mtoto kwenda kuoa mwanafunzi, wote watachukuliwa hatua za kisheria.

“Kuna taarifa nimezipata kuwa baada ya watoto kupewa mimba wazazi au walezi mnamalizana na wahusika kwa kupeana ng’ombe. Sasa tukikukamata unamalizana na mtu aliyempa mimba mwanafunzi na wewe tunakufunga.”

Pia Waziri Mkuu aliwataka wanafunzi wote hususani wa kike wasome kwa bidii ili watimize ndoto zao na wasikubali kushawishika kwa sababu watashindwa kuendelea na masomo yao.

Habari Kubwa