Utoro wa Mbowe wapeperusha maswali kwa Majaliwa bungeni

14Nov 2019
Gwamaka Alipipi
DODOMA
Nipashe
Utoro wa Mbowe wapeperusha maswali kwa Majaliwa bungeni

SPIKA wa Bunge, Job Ndugai amesema utoro wa Kiongozi wa Kambi Rasmi ya Upinzani Bungeni, Freeman Mbowe umekuwa ukisababisha nafasi ya maswali ya moja kwa moja kutoka upinzani kwenda kwa Waziri Mkuu kupotea kila mara.

Ameyasema hayo leo Novemba14,2019 asubuhi bungeni mjini Dodoma wakati wa kipindi cha maswali kwa Waziri Mkuu kutoka kwa Wabunge.

Ndugai amesema kwa mujibu wa utaratibu wa mabunge ya Jumuiya ya Madola Upinzani hupewa nafasi ya kwanza kuiuliza swali Serikali, lakini kwaa hapa nchini nafasi hiyo hupotea kila wakati kutokana na utoro wa kiongozi huyo.

“Waheshimiwa Wabunge niwataarifu tu kwamba utaratibu wetu wa kipindi cha maswali kwa Waziri Mkuu swali la kwanza kabisa huwa linakuwa hakiba kwa kiongozi wa Kambi rasmi ya upinzani bungeni, lakini kwa leo kama mnavyoona kiongozi huyo hayupo,” amesema Spika Ndugai.

Amesema Kiongozi wa Kambi Rasmi ya Upinzani anaweza siku zote asiwepo bungeni lakini siku ya Alhamisi ni muhimu awepo kutokana Waziri Mkuu kuwapo na anatakiwa awe wa kwanza kuuliza swali.

“Huwa ni fursa pekee ambayo upinzani wanapata nafasi kwa hiyo kiongozi wa upinzani anaweza asiwepo bungeni siku yoyote lakini siku ya alhamisi ambayo ni ya maswali kwa Waziri Mkuu ni lazima awepo,” amesema Spika Ndugai

Amesema hata hivyo hana taarifa zozote za udhuru kutoka kwa kiongozi huyo (Mbowe) na wala hajui yuko wapi.

“Kwa hiyo hatujapata swali lile kwa kuwa kiongozi wa upinzani bungeni hayupo, uwe wapi, uwe wapi kama Spika hana taarifa zako ni mtoro tu kwa hiyo, ni mtoro na ndiyo maana leo unaona kwamba hiyo fursa ambayo imewekwa kwenye kanuni haijaweza kutekelezwa.

“Na ndio maana mnaona kwamba nafasi inapotea potea sababu ya utoro,”alisema Spika Ndugai.

Nipashe lilimtafuta Mbowe ili kupata taarifa za yeye kutokuwapo katika kipindi hicho cha maswali na majibu kwa Waziri Mkuu, hata hivyo simu yake haikupatikana.