Lwandamina apewa baraka zote Yanga

08Nov 2016
Na Mwandishi Wetu
Dar es Salaam
Nipashe
Lwandamina apewa baraka zote Yanga
  • ***Zesco yaanika kila kitu, Hatima ya Pluijm wasaidizi wake sasa...

WAKATI Kocha mpya wa Yanga, Mzambia George Lwandamina akitarajiwa kutua nchini kesho, klabu yake sasa, Zesco United ya kwao, imeridhia hatua hiyo na kumpa baraka zote baada ya kumalizana naye.

Kocha mpya wa Yanga, Mzambia George Lwandamina.

Kwa pamoja, Justin Mumba na Katebe Chengo Mtendaji Mkuu wa Zesco na ofisa habari wa klabu hiyo, jana walitoa taarifa ya kuachana na Lwandamina.

Lwandamina ambaye amekwishamalizana na uongozi wa Yanga, juzi aliiongoza Zesco United kwa mara ya mwisho katika mechi ya Ligi Kuu ya Zambia dhidi ya Nkana FC na jana akaaga.

“Zesco United FC inapenda kutangaza kwamba Kocha Mkuu, George Lwandamina asubuhi hii amewasilisha barua ya kujiuzulu mara moja.

Klabu imeafiki kujiuzulu kwake na inapenda kumshukuru kwa kazi na mchango wake alipokuwa kazini," wamesema.

Uongozi wa Yanga unataka kumuondoa kocha Hans van der Pluijm na wasaidizi wake wote, Juma Mwambusi, kocha wa makipa Juma Pondamali na Meneja Hafidh Saleh wote wazalendo na kuwaleta Mzambia Lwandamina atakayekuwa Kocha Mkuu, akisaidiwa na wazalendo Charles Boniface Mkwasa, Manyika Peter kocha wa makipa na Meneja, Sekilojo Chambua.

Hata hivyo, mpango huo unakabiliwa na upinzani mkali kutoka kwa wadau wa timu hiyo na wapenzi wanaoamini Pluijm bado ni chaguo sahihi Jangwani.

Ikumbukwe wiki mbili zilizopita Pluijm alisusa kwa siku tatu kufanya kazi Yanga na kuwasilisha barua ya kujiuzulu baada ya kukerwa na taarifa za ujio wa Lwandamina.

Waziri wa Mambo ya Ndani, Mwigulu Nchemba aliingilia kati suala hilo na kufanikiwa kumrejesha kazini Pluijm.

Waziri Mwigulu ambaye ni mpenzi na mwanachama wa Yanga, kwanza aliushauri uongozi kumrudisha Pluijm na baadaye akaenda kuzungumza na kocha huyo pia kumshauri akubali kurejea.

Baadaye akazikutanisha pande zote mbili, Pluijm na uongozi wa Yanga katika kikao ambacho inaelezwa makubaliano yalifikiwa kabla ya uongozi wa Yanga kumwandikia barua Mholanzi huyo ya kumuomba radhi.

Habari Kubwa