MWANASIASA mkongwe nchini, Mustapha Songambele amempongeza Rais Samia Suluhu Hassan kwa kuliongoza vyema taifa.

Songambele ametoa pongezi hizo jana mbele ya Katibu Mkuu wa Chama Cha Mapinduzi (CCM), Balozi Dk Emmanuel Nchimbi.

Balozi Nchimbi alikwenda nyumbani kwa Mzee Songambele Mwananyamala mkoani  Dar es Salaam kumfikishia salam za pongezi kutoka kwa Mwenyekiti wa CCM, Rais Samia kwa kuadhimisha miaka 99 ya kuzaliwa kwake.

“Mfikishie salam zangu mwambie anaongoza nchi vizuri sana…nchi imetulia…nchi iko baridi kabisa hata chama nacho kimetulia mambo yanakwenda vizuri kabisa,” alisema Mzee Songambele.

Aliongeza kusema kuwa iwapo mambo yangekuwa hayaendi vizuri, basi pamoja na umri wake mkubwa, angeenda makao makuu ya chama kusema.

Kwa upande wake, Balozi  Nchimbi alisema Mzee Songambele alifanya kazi kubwa ya kujenga Chama na Serikali tangu enzi za TANU na baadae CCM. 

Songambele alizaliwa mwaka Mei 25,1925, mkoani Ruvuma kabla ya kuhamia Magomeni, jijini Dar es Salaam, ambapo walikuwa miongoni kwa watu waliompokea Baba wa Taifa Mwalimu Julius Nyerere jijini humo.

Alikuwa rafiki mkubwa wa Mwalimu Nyerere na ndiye aliyemtafutia kiwanja Magomeni Mikumi ambako kuna nyumba ya Mwalimu, hivi sasa ikiwa ni Makumbusho ya Taifa.

Aliwahi kushika nafasi kadhaa ndani ya Chama na Serikali, ikiwa ni pamoja na ukuu wa mkoa.